نظرة إصلاح

ليتك مثل ما قلت تبعد وترتاح
ويرتاح بالك.. قبل يرتاح بالي
وأغمض عيوني على ليل الأفراح
وانت بعد مثلي تنوم الليالي
يا عاشق الفرقا على جمع الارواح
انظر لحالك.. قبل تنظر لحالي
شف الأمل لي فز في نظرتك طاح
وماتت عليه احلام رغبة خيالي
يكفي خلاص إلى متى.. سرنا باح
وحنا حبايب بالحكي للاهالي
العشرة اللي كلها جراح في جراح
تجني وراها ضيقةٍ ما تبالي
ياما تحملتك على نظرة إصلاح
ما ابي الزعل يكبر بعين التعالي
وأنت تمادى في خطا كل ما راح
ما قد حسبت حساب نقصان حالي
تبي الصراحة ابتعد يمكن ارتاح
ما قد بكت عيني على فقد غالي