ورقة قديمة

يا سعود قم هات الدلال المهانيف
في ليلةٍ ناخذ سهرها قطوعه
احمس وكيّفها ترى طاب لي كيف
واستدن (مزعل) يا شفاتي وصوعه
إلى تهيّض بالعوا والزعانيف
يشدي عواذيب ذيبٍ شكا حر جوعه
يشدي عوا ذيبٍ بروس المشاريف
حاديه حادي والهبايب تلوعه
حتى يجيب مسيّر البيت والضيف
مثل العقيد اللي تلافت جموعه
مخصوص إلى صار الجماعة مواليف
ما ركز الشيطان معهم بكوعه
يا زين سجّتهم وزين السواليف
ما دوّروا واحد بالآخر طموعه
والى أحدث الجهّال بعض التخاليف
ستدركوها قبل تكثر فزوعه
تلقى لهم سمعة وهيبة وتصريف
وكل يجي فعله على قد نوعه!