ياما جرى لي

يا الله يا اللي سايله ما يخيبي
يا منفذ ارزاقه بليا تحاسيب
طالبك تغفر لي ذنوبي وعيبي
باكر إلى وردت علي الطواليب
دنيا فرحها من كرهها قريبي
هني من لا اشقاه همه عن الغيب
طرايف الدنيا تحضر وتغيبي
لو ساعفت بواقةٍ للاصاحيب
صنيتان يا ابني كان لك بان عيبي
استر علي ان كان فيَّه عذاريب
ياما جرى لي في شبابي وشيبي
من قطعة الفرجة على شمخ النيب
وقحص الامهار مشعثرات السبيبي
جرايرٍ يشبع بها الطير والذيب
الله ينادي لك بحظ ونصيبي
يدفع لك الايام يا مرذي النيب
ياما نحول في مرامي تصيبي
خلاف جيش يوم يقفي صواليب
يوم ان هراج السعة يتقي بي
عند المواقف يلزمن المواجيب
اليا ركبنا اكوارهن ما نهيبي
نبعد حراوي الذم عنا الى جيب
الذم ما يلقى علينا مصيبي
لا عدت الافعال بالكره والطيب
كود الظلايم من ضعاف النصيبي
والا فلا للشين فينا مقاضيب
ياما قطعنا سرح والا عزيبي
في دبرة المولى وحنا مناديب
مع درب شيخ ما يبوق الصحيبي
يشكون منه القوم كفى المحاليب
ياليت عصرٍ فات يرجع قريبي
وان الصبا يجلب ويغلى إلى جيب
نشريه لو انه علينا تعيبي
والا نجيبه من ديار الاجانيب