ذكرى المجد

ذكرى الوطن حلت ونور بها الكون
عرس الديار.. اللي نهلنا غلاها
سلام.. يادار بها العز مضمون
تاج على كل الديار.. اعتلاها
يا ديرة اللي.. بالشريعة يحكمون
ما احدٍ ملك درب المعالي.. سواها
في يوم ذكرى المجد ستة وسبعون
في عهد ابو متعب.. تزايد حلاها
نسل الاحرار اللي على الحق يمضون
وبكلمة التوحيد.. سارت خطاها
ونجل الإمام اللي بسيفه غدا الكون
امن وامان وثوب عدل.. كساها
عبدالعزيز اللي به الحق مضمون
امن دياره يوم بالخير.. جاها
من عقب ما كانت غثا حرب وغبون
صارت جنان الكون.. واحلو ماها
ووحد قلوب.. بين طاعن ومطعون
الين صارت بالصداقه.. تباها
عبدالعزيز.. اللي على الحق مدفون
عساه بالفردوس.. ينهل حلاها
خلف ملوك للعرب.. درة الكون
أشرق به التاريخ.. وانور سماها
عهد السعود.. وفيصل المجد والعون
اللي بشرع الله.. نور ضياها
وخالد وابو فيصل على الشرع يمشون
والنهضة اللي في بلادي.. عطاها
الله.. يجمعهم بجنات واغصون
وخير تعدا للسحاب.. وعطاها
ويمد عمر اللي.. به الحق مامون
خادم ديار.. الله مالك حماها
عبدالله ابو متعب له الخلق يدعون
والخير من مدة يدينه.. لفاها
سيل على شعبه ولأرض العرب عون
وعلى العدا.. هو سقمها هو عناها
وولي عهده.. قرة القلب وعيون
سلطان.. يافخر الديار وهناها
فراج هم اللي به الهم.. مكنون
وابو اليتيمه.. يوم تفقد عشاها
واخوانه اللي للمصاعب يحلون
نسل الملوك اللي.. عظيم مداها
والدار بأمر الله.. غدت خير ما يكون
وحفظ اله العرش ربي حماها
واللي نوا بالشر.. هذاك مطعون
كيده لنحره صار.. ربي رماها
وانا احمد الله.. ديرتي عز مضمون
برمالها.. بجبالها.. في حصاها
محفوظة.. بأمر الولي خالق الكون
من اول الدنيا.. الى منتهاها