أعزي أهله والقريب الموالي

مرثية في الخال الشيخ سعد المحمد المعجل - رحمه الله رحمة واسعة:
***
يالموت لا تأخذ من الناس غالي
لا تأخذ اللي بالحشاء ساكنٍ فيه
يالموت لا تأخذ عزيز الرجالي
خله يدورج خطوته عند أهاليه
يالموت لا تأخذ حبيبي وخالي
حرمتني من جلسة بين أياديه
يالموت خذني عنه خله بدالي
خل العيون اللي تحبه تراعيه
خله يعيش ويفرحون العيالي
لا تأخذه يالموت وش حاجتك فيه
قال أنت مؤمن في عزيز الجلالي
تقرأ الكتاب وتفتهم في معانيه
ما تدري ان الخلق وقت وآجالي
عند الأجل ما يقدر أحدٍ يعديه
كلٍ كتب ربي عليه الزوالي
واللي كتب حيٍ فلا أحدٍ بيفنيه
وأنا على المكتوب مالي مجالي
أمشي على تدبير ربي وأسويه
من حد خلقتها لتالي التوالي
الميت نختاره وغيره نعديه
ما هوب خالك بس يا بن الحلالي
من صار وقته تأخذه ما نخليه
قلت السموحة منك عما جرى لي
آمنت باللي كل الأقدار بيديه
أعزي أهله والقريب الموالي
وأعزي الجيران والمملكة فيه
وأعزي اليتمان في شف بالي
وأعزي الديرة وبيتٍ ربي فيه
وأعزي اللي يقصدون السؤالي
وأعزي المحتاج في اللي مواسيه
يا ربي أقبل دعوتي وابتهالي
وأقبل من اللي خلف الإمام تنعيه
يا قابل التوبة عليك اتكالي
تجزاه بالجنة بجودك وترضيه
ثبت حبيبي يوم طرح السؤالي
وبروضة الفردوس يارب تجزيه
وبرحمتك عطني الصبر والعزاء لي
وأجبر عزاء اللي يعرفونه وماضيه
واختم لنا بالخير في كل حالي
والمسلمين ومن دعا الله يرجيه
صلاة ربي عد وبل الخيالي
وأعداد من حجوا لبيته تلبيه
على محمد من قديمٍ وتالي
وأزكى سلامي في نهاية قوافيه