العمر محسوب

قالوا تحب وقلت بالحب مذنوب
ماهو بحب إلا عذابي وعوقي
الحب شر العقل والعقل مسلوب
يلعب به اللي قام يلعب بشوقي
حبيت من بين البشر حلو رعبوب
ترفٍ لنظرات الهواوي سروقي
توه ودوب الحب يا دوب يا دوب
خلاه من درب الجهالة يفوقي
صغير بالسن غرقان بلعوب
ما يدري إن حبه جرى في عروقي
لاهي بوقته بين غاية ومطلوب
وأنا فؤادي من هواه محروقي
ياليت لي قلب عن الحب باتوب
وارتاح مثل الناس واملك خفوقي
وأريح هجوس لها الهم مكتوب
يمكن هجوسي من عناها تروقي
أنا أشهد إني من هوى الزين منكوب
أمشي بغربي وأحسب أنه شروقي
تيهت غلا مدري غرام بلا صوب
متوجهاً بي في متاهة طروقي
والقلب منه شوي وشوي ويذوب
لولاي أهدي منه وأبدع طروقي
شربت كاس الحب وامر مشروب
علقم له الروح العشيقة تذوقي
وسهرت ليله وارسهم سهوم وقلوب
يالين قلبي راح كله فتوقي
مشيت دربه في متاهات ودروب
واسوق رجلي في المتاهات سوقي
الحب همه هم وذنوبه ذنوب
دايم وراعي الحب قلبه شفوقي
وأنا الذي بالحب صبري له أسلوب
صبر على قمة خيالي يفوقي
صبرت صبر أيوب والعمر محسوب
وعساه فدوه في غرام معشوقي