هدة الطير

ربيع قلبي يا علي هدة الطير
في خايع قفرٍ من الزول خالي
مابه يكود متعبات المداوير
برق الدواغر متعبات العيالي
لافرّع النادر وجاهن مخامير
والله وما اغبط اللي رصيده خيالي
قرناس بكر ولاقنوه الصقاقير
من ماكره جبته بخشم الريالي
اليا قفيته كنه ادباحة الزير
واليا نطحته مثل شكل الهلالي
جبر المناكب زين كل المغاتير
الريش عاري والموامي اطوالي
ياكن في يدينه سيوف المناعير
شيوخ نجد اللي تهد الجبالي
افجح قصير الساق عوق المعاشير
اليا روحن والنود صلف وشمالي
عشقي قديم للحرار المشاهير
احبها ياخوك باول وتالي
ادفع كثير ولا حسبت المخاسير
ما أحدٍ شريك يا علي في حلالي
ما همّني ياخوك جمع الدنانير
الطيب هو همي وهو رأس مالي