هذي هي الدنيا

بعض العرب مدري وراهم قطوعين
معقول مشغولين هالوقت كله
اللي محله داخل القلب والعين
لو غاب عشر سنين يبقى محله
طبعي ولاني مبدله لو بعد حين
ومن له خليل درب خله يدله
هذي هي الدنيا ولو طبعها شين
كلٍ وله أحباب داخل سجله
يفرح بشوفتهم ويحزن من البين
وينثر دموع الشوق لا غاب خله
أحبابنا واصحابنا والقريبين
كلٍ وراه ظروفه المستقله
لكن ترى للوصل شوق ومضامين
والشوق خلاني على نار مله
الغالي أبصبر على شأنه سنين
مدام عيني مارأت منه زله
خليت قلبي وسط مخباه تأمين
عادي يبوقه.. يأخذه.. يستحله
حتى ولو لقياه - وإن قال - بعدين
اهم شي ان الغلا في محله