انت فرحة خاطري يا أوفى حبيب

لو تشوفك عين والأخرى عن النظرة محاله
تسهر الاولى فرح والثانية تسهر حزينة
يابعد روح المولع ياعناه ويا نضاله
يا أول ايامه وباقي ماتبقى من سنينه
يعجز الشاعر يجيب لحسنك الباهر دلاله
واختصرت الوصف في بيت يقدم لك يمينه
في تواضعك الشموخ وفي قساوتك العدالة
وان تواجدت بمكان تقلب الضوضاء سكينة
انت فرحة خاطري يا اوفى حبيب ينعناله
وكان ما اوفيت بوعودك تترك آمالي سجينه
قلت لي عند اللقاء فرصة سعيدة في عجاله
وجاك عجل ردها ياصاحبي فرصة ثمينة
وطولت غيبتك مدري عن قصد ولا جهاله
ما دريت ان لك حبيب متعب قلبه حنينه
لازياره لا اعتذار ولا اتصال ولا رساله
كيف تنسى صاحبك ما تدري انك نور عينه
عيني البحر ودموعي موج من جاله لجاله
وشاطي الحرمان مايرسي على جاله سفينه
المدن عندي سواء في مهجتي قدر وجلاله
بس انا حبيت يالمحبوب لجلك هالمدينه
واجزم ان كل يبي خله ويفرح في وصاله
مثلما يفرح غريب الدار بأهله واقربينه
ولاتحسب جيتك لوجيتني بكره جماله
لو تجي ماهي بمن خاطرك تبقالي غبينه
وكان فضلت التثاقل كل يروح لحاله
حالف اني ما اطرد المقفي ولا اسأل عنه وينه
انت تدري ما خضع راسي ولاميل عقاله
لأي شخص في الوجود ولاحد يقدر يهينه
والمثل قد قال دام الموت وارد لامحاله
لاتموت الا بطل ولاترى موتتك شينه