القناعة

رزقي على الله وعافيتي ومحياية
والناس وش عندها يا بدر تعطيني
الرزق مضمون كله عند مولايه
رب البشر كلها متكفلٍ فيني
اللي على سيد الأمة نزل الآية
وضح لعبده طريق الزين والشيني
ماني مبيّن لبعض الناس شكوايه
أشكي على ربي اللي ما يخليني
والراس مرفوع دايم وأرفع الراية
وأعز نفسي وهذي ميزةٍ فيني
لو كان ما آجد ريالٍ وسط مخبايه
أقول تاجر وعندي ما يكفيني
من صد عني عنه صديت بقفاية
وقطعت حبل المواصل بينه وبيني
وش أرتجي من قليل الفود من شاية
والله لأقطع معه كل العناويني
وارافق الطيب اللي رفقته غاية
اللي إليا احتجت له ياقف ويشفيني
ولاّ الردي ما يرافقني بمشايه
لو هو قريب من الربع القريبيني
وأنا التوكل على الله دوم مبدايه
واللي كتب لي بعرض اللوح ياتيني
وأقول كلش ترى له حد ونهاية
مثبّتٍ بالأدله والبراهيني
هذي صفاتي وبعضٍ من مزايايه
وكلٍ بعرفه وأنا عرفي يقديني