التوكل على الله دوم مبدايه

رزقي على الله وعافيتي ومحيايه
والناس وش عندها يا بدر تعطيني
الرزق مضمون كله عند مولايه
رب البشر كلّها متكفلٍ فيني
اللي على سِيد الأمة نزّل الآيه
وضّح لعبده طريق الزين والشيني
ماني مبيّن لبعض الناس شكوايه
أشكي على ربّي اللي ما يخلّيني
والرأس مرفوع دايم وأرفع الرايه
وأعزّ نفسي وهذه ميزةٍ فيني
لو كان ما أجد ريالٍ وسط مخبايه
أقول تاجر وعندي ما يكفّيني
ومن صدّ عنّي عنه صدّيت بقفايه
وقطعت حبل المواصل بينه وبيني
وش أرتجي من قليل الفود من شايه
والله لأقطع معه كل العناويني
وأرافق الطيّب اللي رفقته غايه
اللي لاحتجت له ياقف ويشفيني
ولا الردي ما يرافقني بممشايه
لو هو قريبٍ من الربع القريبيني
وأنا التوكّل على الله دوم مبدايه
واللي كتب لي بعرض اللوح يأتيني
وأقول كلّش ترى له حدّ ونهايه
مثبّتٍ بالأدلة والبراهيني
هذي صفاتي وبعضٍ من مزايايه
وكلٍّ بعرفه وأنا عرفي يقدّيني
- الشاعر/ سهل بندر المقاطي