خل الملامة

ولا كل ما ينقال نسمع حروفه
للشعر أهله وقيمة الشعر معناه
وكل بعرفه والرجال معروفه
أحدٍ يجي وقته على ما تمناه
وأحدٍ تجي دون أمنياته حتوفه
وأنا الذي هم الليالي تولاه
أشكي زمان شيبتني صدوفه
على عشير زوّد البعد فرقاه
متى العيون اللي تريده تشوفه
الوقت الأول ما بقى غير ذكراه
والوقت الآخر بعدتني ظروفه
يا نور عيني يكفي القلب ما جاه
خل الملامه والعتب والحسوفه
سلم الهوى ما فيه عدل ومساواه
وحكم القدر جرد بوجهي سيوفه
اصبر وأنا أصبر وآخر الصبر نلقاه
محموده عقبا الصبر ومخلوفه
ولابد من بعد الفراق الملاقاه
يا اللي ملكت الزين وأحلى وصوفه
سلطان بن عبدالله الجذع