عيد الرياض

عيدك سعيد بسامي العز والجاه
يا ديرةٍ بالقلب تسكن وحدها
قايم على التوحيد والعدل مبناه
هي قبلة الإسلام كلٍ حمدها
ولا عيادنا بالقلب فرحه رسمناه
تلقى على وجه الطفوله سعدها
في ديرةٍ بالطيب تعرف مزاياه
دار الكرم والجود للي نشدها
ويا رياضنا يا درةٍ في حلاياه
العيد به عيدين كلٍ قصدها
دارٍ كساها الورد والعطر يزهاه
تسكن خفوق اللي رفع من عمدها
(سلمان) من شاله على كف يمناه
ثبت على راس المعالي وتدها
دارٍ لها ذكرى وبيعة موالاه
يوم الوفاء مدة على العهد يدها
للقايد اللي حبه الشعب وأغلاه
ترفع تهانيها وتعطي عهدها
عبدالله اللي وافياتٍ سجاياه
شهمٍ كريمٍ والمعالي صعدها
(وسلطان) راعي الجود والجود مبداه
به سولفت أم اليتامى لولدها
والمملكة بالروح والمال نفداه
بافعالنا والقول حنا سندها
يا عشقنا يا نجمة الكون وضياه
يا اجمل عروسٍ طهر الله جسدها
ندعي إله الكون يلطف ويرعاه
ويحمي ثراها من عدوٍ حسدها