أغسطس آب

لا يا حمد لا تبحث الأسباب
والوقت لا تامن عواقيبه
وان كانها تحقيق واستجواب
سجل ودون كل مادلي به
الحب بلوى والهوى غلاب
وويل من طب بغياهيبه
ويا والله اللي ما حسبت حساب
رجلي طريق الحب تمشي به
وانا ادري ان الحب حرب اعصاب
والمسعد اللي سَلْم ما بلي به
ليما بليت بمترفٍ جذاب
ما غير اهوجس به واهذريبه
غرو لك الله يسلب الألباب
بالسلهمة والملح والطيبه
ماكنه الا والغزال اقراب
من دون لا شكٍ ولا ريبه
عاشق عيونه في عيونه ذاب
ذوب الذهب وان سلهم غدي به
رمشه كتيبه والعيون كتاب
تاصلك لاسلكي مكاتيبه
شلفا ذياب وفي يمين ذياب
ياعنك ما يبرى من تصيبه
تصوب العاشق بعكش اهداب
وبنظره توديه وتجي به
اهواه واهوى ليله المنساب
واسري معه واضيع واسري به
واهيم وادخل جوه الخلاب
واطرب واغني له واغني به
واعيش جو انشودة السياب
واغيب واصحي به ولا اصحي به
وان مر طيفه سيد الأحباب
وانا بنومي قمت اهلي به
افز به وافز له باعجاب
ضيفٍ تهلي به معازيبه
لاوعي لا تمييز لا استيعاب
الزين ما سمع به ولا اوحي به
عاشق عيونه يا حمد منصاب
والموت كانه مات مادري به
يا دمعتين ونظرتين عتاب
للجادل اللي صده مصيبه
اتلى العهد به في اغسطس آب
الفين وخمسه ذاك علمي به
أسهر وقلبي يا حمد من غاب
والهم يقبل به ويقفي به
ابا اتمنى والبخت جلاب
يا الله عسى الاقدار تومي به
يلملم شتات الهايب المرتاب
ويبعثره ويعيد ترتيبه
ويمد لي من بعد طول غياب
فنجال واقدع من مذانيبه