عاقل الزيد

المسكنة.. والمهزلة.. والمذلة

وين انت ياللي قلت لا صرت محتاج
ازبن عليك وكل كرب تحله
لو ان كربي ثقل ابانات وسواج
واثقل من جبال السراه المطله
له ترتكي ما تحسب احساب الامواج
له ترتكي وتقول لطويق خله
وتصير لي في عتمه ايامي سراج
السود وإلا البيض ما هن اشكله
القي لهن في حزة الضيق مخراج
وادل دربي قبل اجيك وتدله
هذا كلامك بالرخا قبل الاحراج
حبيت اعيده واسمع العلم كله
اليا اسفهل حجاج واستقطب حجاج!!!
حبل الشدايد ما انت كفو تفله!!
وهداج يكرم عنك محشوم هداج
هداج من جاله ضما الكبد بله
يا للاسف كيف اعتبرتك لي سياج
يا قلب قله لو تكرمت قله!
ما فيه عله ما لها طب وعلاج
الا ثلاث ما لهن طب لله
ولا اعرف لهن مبدأ.. وسيرة.. ومنهاج
المسكنة.. والمهزلة.. والمذله!