عسى جنان الخلد منزال الفقيد

علم لفا وقعه على الأمة شديد
ما فيه حي فوق الأرض إلا سمعه
يوم اعلن الديوان للعلم الوكيد
موت العظيم الكون كله زعزعه
بكت عليه الناس باليوم النكيد
واليوم الآخر والجموع تشيعه
وانا بكيته عبرة عيت تهيد
اكظما والجفن خانه مدمعه
ابكي وانا ادري بكايه ما يفيد
مما معي والا البكا ما يرجعه
الشكوى لله يفعل الله ما يريد
حكم القضا اليا مضامن يمنعه
عسى جنان الخلد منزال الفقيد
ومع خيرة الابرار ربي يجمعه
وعسى الثرا يصير له ملك جديد
في برزخه يجني ثمار اللي زرعه
ما مات ابوفيصل وحنا نستعيد
للذاكرة ونشوف كلش مبدعه
ابداع خلا عمر ابوفيصل مديد
لومات باقي كالكتاب انتبعه
رجل المعارف والمعارف ما تبيد
تزيد تبقى راسخه متفرعه
وحنا على منهال ورده نستزيد
نشرب صفا مشرابنا من منبعه
ما فيه شبر الا وبافعاله يشيد
ولا اتجاه الا تشوف المنفعه
وتشهد لابوفيصل على الفعل الحميد
التوسعه واللي يشوف التوسعه
وانفاق مكه والخيام اللي نفيد
وسط المشاعر للحجيج مشرعه
وكم مسجد بالأرض مع صرح مشيد
اقام ركنه واعتنا في موقعه
ويكفي على فعل الفهد وافضل شهيد
المطبعه واللي تخط المطبعه
خيره كثير ولا نحيطه بتعديد
قلب الوفا بحر العطا يا ما اوسعه
لو تنظم الدنيا لابوفيصل قصيد
صعبه نوفي ربع ما فينا صنعه
وما مات ابوفيصل وابومتعب يعيد
نفس اللقب وعد وعهد يقطعه
يا خادم البيتين يا لعهد السعيد
طيب المزايا يا المليك مجمعه
اللي قريب يشوفها واللي بعيد
يا كوكب في شعته وبمسطعه
ويطلعته واطلالته كوكب فريد
ماله شبيه ولا حلي بمطلعه
لامامنا جينا على العهد التليد
عهد عليه الدين وصا وشرعه
في محكم السنه وقرآن مجيد
نعاهده ونوازره ونبايعه
ونمشي معه في سكته ولا نحيد
سمعٍ وطاعه لا ومر حنا معه
وما دام ابوخالد لابومتعب عضيد
فشراعنا قدام كل الاشرعه
على البحر وان صادفه بالدرب بيد
صارت مراكبنا جيوش تقطعه
واللي بعكرات البقع يبغى يصيد
مستنقعه نشف هوانا منقعه
واهل النشب من كل شيطان مريد
منكم نعوذ بواحد نتضرعه
انه يجنب دارنا كيد المكيد
واللي يناطح سيف ابتر يزمعه
فهد بن عبدالرحمن البهلال