إياك وإياك

ليتك معي وتشوف حالي بلياك
وتشوف دمعي كيف ينزل سكايب
غديت ما بين العتاب وجفيّاك
وقلبي من الهجران والصد ذايب
اتعبتني يا كامل الزين وياك
واتعبت قلب شاف منك المصايب
كل ما اسج يضيع فكري بطرياك
تقفي وتقبل مع نسيم الهبايب
يا وجد عيني كل ما ذكر حلاياك
كني اشوفك حاضر وانت غايب
اصبحت من جورك وجملة خطاياك
جسمي شباب وداخلي صار شايب
ان كان غير الصدق تخفي نواياك!!
انا اسوق الصدق ما به شوايب
يا ويل حالي كان بانت خفاياك
انا اشهد انك صرت كلك عقايب
المشكلة!! لا صرت هاوي كواياك
ارفق علي شوي ما دمت طايب
لا قلت احبك عايش وسط دنياك
لا لا.. ترجعني من الشوق خايب
ماني بمنكر يا حبيبي عطاياك
بس انت لا تنكر قلوب الحبايب
اياك يا مضنون واياك واياك
يصبح غرامي من تجافيك هايب
فالح الشلوي
العمر قاضي
شدو وأنا شديت والعمر قاضي
واتلى العمر جريت ونات وآهات
عليك يا اللي له فؤادي يحاضي
من عقبكم فارقت حلو المسرات
اقفي وآنا قفيت والكل راضي
بيني وبينه طولن المسافات
بر الوطن وأنا بوسط الرياضي
عقبه غشاني من عناء الموت سكرات
ياشين بعدك يا بو سودنٍ غواضي
أونس على كبدي سعير المليلات
والدمع من عيني على الخد فاضي
يشدي حقوق المزن وإن هل زافات
والحب ما يشرى سوات المقاضي
ولا هوب قولن ينتشر بالمجلات
الحب سهم بين الأضلاع شاضي
أما سعير أو برد خضر الجنينات
عانيت بأسبابك جروح غماضي
والهم له في القلب صوله وجولات
لكن بعيش الحب حاضر وماضي
لو شأن وقتي ما عليه حسوفات
وياليت للعشاق والحب قاضي
قاضي على حكمه تتم المساوات
(الحصني)