يوم بان الشيب

يانصيبي لو تجيب الغنايم في يدي
ما شكرتك يانصيبي ولا قلت معذور
ما وقفت بجانبي في شقايه وسعدي
يوم ضنكات الدهر بينت فحوى الصدور
يوم أنا بأول شبابي وتوي مبتدي
في حياةٍ تحرج الرجل لو قلبه جسور
رحت عني يانصيبي وراء حد بلدي
بيني وبينك محيطات وأنهار وبحور
ويوم بان الشيب في عارضي جيت تعدي
ويش أبيبك عقب هالعمر لو كلك سرور
عشت بالدنيا وأنا ما معي غير جهدي
ما قدرت أزرع بساتين وأعمّر قصور
ما فزع لي ولد عمي ولا عم ولدي
ولا رضيت أمد يمناي وأقول معسور
عز نفسي واتكالي على الله مقصدي
خير لي من عيشةٍ جات من دهن السيور
قالوا أهل المعرفة لا تحيزم بالردي
كل ما تبغاه يرقى يحول بك حدور