أحتاج أسولف لك

احتاج اسولف لك بلا ترتيب
و افرد صدى صوتي بليا آه
الحُب ما هو فصل للتعذيب
الحُب مثل الصدق في فحواه
اما يعمّر للزمن .. للشيب
والا بلاش نحيد عن معناه
لو عشت في حبك بعمر شعيب
احس توي جيت في مرساه
يا صاحبي بين الوفا و الطيب
كم شاعرٍ غنى على ليلاه
من منطلق غدر النوايا عيب
اقول تصديق الوهم ما اغباه
دامك تعرف ان النصيب يصيب
القلب لا تتعب على فرقاه
بيني وبينك ندفن التكذيب
و نبني غرامٍ شامخٍ مبناه
ولا به مجال الشك و الا الريب
اعرف جنون الحُب يا ويلاه
اعشب لعينك و انهمر لك طيب
و استرجع الماضي معك واهواه