درب المراجل

خذيت فالدنيا دروس وتجاريب
وعز الله ان كثر التجارب مفيده
توي شباب وغاديٍ عارضي شيب
من كثر ما اصادم حياةٍ عنيده
دنيا لقيت بها العناء والمتاعيب
ومن سلم منها اليوم بكره تصيده
والعمر شمسٍ تظهر اليوم وتغيب
ويا طيب من حط الجميل برصيده
هذي تراها من كبار المكاسيب
ياللي تحبون الفعول المجيده
والطيب مرقابٍ ودونه مراقيب
ولا يذبه كون خطوا الوليده
ودرب المراجل كايد وعسر وصعيب
ما هو على ما قيل فرصه سعيده
عدٍ بعيد ماه يبغى جواذيب
ولا كل ورّادٍ خذا ماه بيده
سلم على اللي ينطحون المواجيب
لما اقبلت من كل فجٍ عديده
وجيه الرجال معطرين الاشانيب
بمعتقٍ فيه المزايا فريده
اللي تكيل الهيل وسط المرابيب
يوم البخيل من الكرم تقصر ايده
لا شٍ يصَّر القرش في داخل الجيب
وان مات ما قالوا فلانٍ فقيده