العاقل لنفسه خصيم

هي قصيدة نادرة في زمن تشابه فيه الشعر.. ولن أقول أكثر من ذلك لأن قارئ المدارات مميز.. ويجبرنا على اختيار المميز دائماً:
ليت الأسباب يا العقل السليم السليم
صحة الجسم في قولٍ رووه الرواه
قول معروف لكن منتجه من غشيم
ما تمعن وعن بعض الزلل ما حماه
أتضح لي وقلت القول هذا عقيم
وأعتبر شاهد إثباتي تجارب حياه
فيه جسمٍ سليم وفيه عقلٍ سقيم
وفيه عقلٍ سليم بجسم يصعب دواه
كل ذي علم يوجد فوق علمه عليم
جل شأنه ولا نعبد إلهٍ سواه
الله اللي جعل موسى نبيه كليم
بأرض وادي طوى ما عنده ألا عصاه
لكن العبرة العاقل لنفسه خصيم
قول مأثور ما حصلت فيه اشتباه
الحكيم الله اللي علمك يا حكيم
والمجانين حكمتها سفاه بسفاه
لو تصيب الهدف مرة برمية رجيم
باقي الرمي لا دونه ولاهي وراه
من تعدى حدود العقل ما يستقيم
(رأيه أبتر) وعرفه ما يقدي خطاه
ما يفهم على حسب اعتقادي فهيم
وفاقد الشيء لو طال المدى ما عطاه
الله اللي وهبنا العقل والله كريم
وأبخل البخل في قول العرب بخل جاه
فلسفة لكن أسلوبٍ جديدٍ قديم
مثل نقش الكتابة فوق خد الصفاه