غاب البدر

أبدى بذكر اللي على الخلق منان
الواحد اللي ما يشابه بثاني
غاب البدر من بين ربعي والاخوان
يا شين علمن عن وفاته لفاني
لا شفت انا بدر الدجى يا بدر بان
جالي من الضيقات شينّ غطاني
ذكرت يومك بيننا كنك حصان
ولهيبتك ترجيك وضح الثماني
يا خوي من فقدك وانا بهم واحزان
ما راح زولك عن خيالي ثواني
وين انت يا للي بالطهر صرت نيشان
ما حدن يمسك بالشرف صرح باني
الله يصبرنا على كل ما كان
يا ليت من خبّر بموتك نساني
بدر غدر بك من حسبت انه انسان
جعله فقيده ما يشوف الجناني
ما خاف يا قف يوم روغات الاذهان
قدام ربي وسط مجرم وجاني
الله يحاسب من غدر بك بميزان
ويرد حقك من حقيرٍ هداني
يا بدر ابويه قبل ما يموت وصان
أخلّد اسمك في ولد كان جاني
وسميت ما جاني بدر قلت من شان
كودي اشوفك به عيانن بياني
ويسلم لي اللي باشيّن الوقت لي زان
ابو وعد محتل زهرة كياني
لملم جروحي ما تضاعف ولا لان
وخلاني اسمّي بدر ما نهاني
الله يجيره من صواديف الأزمان
هو شمعتي لا اظلم عليّه زماني
يمه بدر شوفيه في كل الأحيان
وانسى جروحن فرخت بالمحاني
يمه بدر ما مات شوفي بالاعيان
يحمل صفات اخوي زين المعاني
الحمد للي بالمخاليق منان
إلى أخذ من ناس عوض بثاني