دورة الدنيا

تدور الأيام وابن آدم يعيش بخير وارزاق
دام العوافي تحقق له وله يمنى طليقه
يمشي وياخذ نصيبه لو يصيبه هم وارهاق
الى توكل على الله سهل الله له طريقه
اللي لدرب الوفاء والمرجله والطيب ينساق
ما تخلفه ميلة الأيام وافكاره عميقة
يقدر يساير جميع الناس بالحكمة والاخلاق
وينقذ نفوسٍ من الاوهام بالغبه غريقه
لو ان جور الليالي حملها ما هوب ينطاق
الحمل لاجار ماحي معه قدره يطيقه
لكن يصبر على الدنيا وياخذ كل ما لاق
ولابد من حاجةٍ مع دورة الدنيا تعيقه
ما فيه حيٍ من امرار الليالي ما بعد ذاق
هذي حقيقة ولا احد منكر قول الحقيقه
القلب ما يجرحه عشق وغرام وحب وافراق
ما يجرح الا رفيقٍ بار في عشرة رفيقه
هذه مصيبة وتمرض كل قلب وتحرق احراق
من كبرها تقطع احبالٍ قوياتٍ وثيقه
العاقل يضيق منها والردي خاطره ماضاق
ما هوب هم الردي لو تالع الدنيا حريقه
العهد امانة ولا هو سلعة تعرض بالأسواق
قلته وانا اطلب واقول الله يفرج كل ضيقه
أحمد بن سعود الحمد