في رثاء الفقيد الشاعر معيض العجي.. رحمه الله.

الله يكتب له الجنة

راع الوفا مات واموت الوفا من موت راعيه
وان كان ما مات من موت العجي حاجه غريبه
معيض ولد عوض كل سمع ذكره وطاريه
شيخ جميع المكارم حطها الله من نصيبه
شهم كريم رفيع الذوق ثابت مباديه
ماهو بعادي فريد النوع شخصيه عجيبه
الناس في نظر عينه كلهم حسبت بنيخيه
يضحك لهم لو بعضهم فيه شك وفيه ريبه
والجار ماشفت مثل معيض بالقانون يوفيه
ويحرص على ارضاه ويسهل له الاشياء الصعيبه
حليم على عباد الله كريم في مناصيه
ويقابل الناس باخلاق ونفسيه حبيبه
الدين مليان به صدره ورب العرش هاديه
ونور الهدايه على وجهه وله رهبه وهيبه
والشعر ماشفت مثل معيض في وزنة قوافيه
والمعرفة في معانيه البعيدة والقريبه
وصينيته عامره لمسند الوادي ومنحيه
وجميع من زار دار معيض قال الله يثيبه
لو تطلبه كل مافي يديه من ماله عطاكيه
مايعرف يقول لافي هينه والا تعيبه
يفرح ليا قلت تكفا في الامور اللي تواليه
ياعز من في الامور اللي صعيبه يعتزي به
وليا بدا بالسوالف ودك انك تستمع فيه
هرجه يسلي وعلم فيه هزعه مايجيبه
والله بكيته ومن يعرف صفات معيض يبكيه
واللي يعرفه ولا يبكيه عاطفته غضيبه
لكن وكر الصقر فيه الصقور اللي تحاليه
يعوضنا الله بهم في معيض وتهون المصيبه
بندر صفاته صفات معيض لاجل انه مربيه
واخوان بندر صقور من رقيبة في رقيبه
والمنزلة لاهلها والسيل يمشي في مجاريه
واللي مناشيه من طيبه تراه يزيد طيبه
واليوم غاب الحبيب وراح عن ديرة محبيه
ولا هو براجع لنا المحبوب من ذيك المغيبه
الله يكتب له الجنة وبالاحسان يجزيه
ويعوضنا فيه باللي في اللوازم ينبدي به