الشعر إحساس

الشعر معنى ورمز وميز وإحساس
الشعر قيفان وأوزانٍ عديده
لو حطوا الناس فيه ألوان وأجناس
أنا مع الشعر ماضيه وجديده
ياما أكثر اللي يقولونه من الناس
لكن هيهات وين اللي يجيده
هذا وأنا فالبحر ما زلت عساس
أخشاه وأخشى قوافيه العنيده
أيو الله أخشاه وأخشى منه الإفلاس
ما نيب أخوه الصغير ولا حفيده
أبا أتحايل وأحاول فك الأقواس
وأهديه عبر المجلة والجريده
للي كلامه يزيل الهم والباس
الغالي المنتحي دار وبديده
ليا تكلم حبس زفرات الأنفاس
وليا سكت عمت الفوضى القصيده
شربت حبه شراب الماء من الكاس
واسقيته العلم في جملة مفيده
أغليه وأشيل مقداره على الراس
وأجيه لو ديرته عني بعيده
أجيه معي الذهب وعقود الألماس
لو صرت من سبته «على الحديده»
كيف أتخلص من الإحباط والياس
والعمر محدود والفرصة فريده
ليا تقدمت قدمي حد الأمواس
وليا توخرت ضاع اللي نريده
أنا المولع بليّا حد وقياس
وأنا المعنّى وخلق الله سعيده