وحيد

يا لايمي وش في يدي؟ مثلي أنا وين بيروح؟
تعبت أجاري دنيتي بس الأسف ما به جديد
عذولي!!.. وريح التعب على وجهي يفوح
قل لي وش اللي لي بقى غير الصبر بس ما يفيد
عمري توسط وانتصف ما عشت به لحظة فروخ
واسمي«سعد» مير السعد عن سكة أمثالي شريد
شلت القهر عمر ودهر مير الزمن كفه شحوح
مستخسر البسمة عليّ لو لحظةٍ من يوم عيد
وكلٍ خذلني ما بقى في هالملا خلٍ نصوح
وأحرقت ليلي بالسهر على أمل صبحٍ يجيد
وكل شيء مات بداخلي إلا الحزن له ألف روح
كم حل ليل وطاف ليل النوم عن عيني طريد
يكفي ودونك نظرتي!!.. صرخ فاعرف ترى صوته بحوح
ما يوصل حدود الشقا لو نسبة أبياته تزيد
بالصمت أبجمع حسرتي لو عيني أفواهٍ تبوح
وأقرب وأمارس وحدتي مبعد عن الدنيا بعيد