في غيبتك

يا صاحبي بعض السواليف تزييف
وانا كلامي يا حبيبي يقيني
حبك شربته شرب شرابة الكيف
ليا صبت الصبه بفنجال صيني
وحبك زرعته بين حدب السراجيف
حتى لنسناس الهواء ما يبيني
مظلله تظليل ما يزرع الصيف
ببيوت محميه غطاها متيني
والله لو هبت عليه العواصيف
انا بأمان وكل ماله يزيني
ياقو حبك يا حسين التواصيف
سيطر على عقلي وقلبي وعيني
في غيبتك يجري لحالي تكاسيف
يلعب بي الهوجاس في كل حيني
وان جيت لو انك تجي جية الطيف
تضحك لي الدنيا ولو ما تجيني
افرح بشوفك فرحة البدو بالريف
ليا ربعوا عقب انهم ممحليني
ارجي عسى الأيام تمشي على الكيف
ونسعد بها مادامنا عايشيني
صالح عبيد الحربي «حريب الياس» /بريدة