أسرار الجمال

نظمت الشعر في وصف الجميله والجمال أسرار
لكن الشعر ما فك الرموز اللي تحلّيها
قليل بحقها كلمة جميله والنظر يحتار
وكل الشعر وبحوره ومدحه ما يكفّيها
جمال في دلال ومن حلاها تبهر الأنظار
أسطوره للجمال ومن تسمّعها حكا فيها
برقّتها يفوح الورد يوقض همسها الأزهار
على قطر الندى والنسمة العذبة تحييها
وأنا اللي في هواها ذاب قلبي واكتوى بالنار
جروحي من سببها ما لقيت اللي يداويها
وقلبي كيف ما تطلب على رغبة هواها سار
ولو تخطي عليه ولو قسمت لازم يماشيها
عشقت وحب قلبي وأشهد انه يوم حب اختار
وهي تستاهل اللي بالهوى والحب يغليها
لها عند البشر من زينها وأخلاقها مقدار
ولا جا مثلها بالناس حاضرها وماضيها
ونظمت الها جميلات القصايد والجمال أسرار
وعجز الشعر عن فك الرموز اللي تحلّيها