لهفة الشوق

قلت اجسد شعوري في قصيدة غرام
وجبت دفتر قصيدي والقلم في يدي
ببتدي بالسلام وبنتهي بالسلام
وبين هذا وهذا كيف انا ببتدي
كيف اعبر عن احساس الغلا والهيام
والمشاعر تزاحم والخفوق يعدي
لهفة الشوق تفضح ما يبي له كلام
وللنوايا الخبيثة البساط احمدي
ان بديت بملام وانتهيت بملام
قالوا اجمل قصيدة وصلوها الجدي
وان تغزلت فيك وقلت احبك حرام
يشغلون الظنون ويظلمون جسدي
يكرهون البياض ويعشقون الظلام
لا ضمير يحاسبهم ولا مهتدي
ما اعم بكلامي لكل واحد مقام
وصاحب العقل يفهم لا عرف مقصدي
ما بغيت القصيدة تنتهي باتهام
بس ما دون حلقي غير حرف بيدي