سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
عثرات الشعراء قصائدكم في كتاب «خرطي القوافي.. إذا هبت السوافي»
نايف المطيري خلك سنافي.. وأكتب «شعر موزون»!
سعد علوش.. ماهنا شعر.. ونواف الدبل من العايدين؟
ومن العايدين.. من العايدين.. ومن الفايزين.. ومن الفايزين. اخوان اخوان.. اخوان.. أحباب أحباب أحباب.. جايين يهنوا فرحانين.. محمد عبده على غفلة بصراحة أنا ما أحب الرسميات، ولكن لابد من الرسميات.. بس خلونا من الرسميات اقرؤوا مقدمة ابن خلدون في شرح جميل الطعون لتوفيق الخليفة: «حرائق الشعر لا يمكن ان تتحول الى رماد؟ وتوفيق يجيد الاحتراق يذهب الى أقصى حدود الاستمتاع.. إلخ» لا تعليق على المقدمة إلا أنها لعبة الصحفي المهم المقدمة في في المخ.. تلف لتوفيق الخليفة اقرؤوا معي: كل شيءٍ يا حبيبي فيك احبه النَّعم.. ال ايه.. وال مالك لوا ثم: أنت كاس الشوق بعروقي تصبه فيك طبع يقلب الدنيا دوا ثم: وصرت كل اللي من أسبابك أحبه تكفى دللني وقل: مالك لواء!! يا جماعة يا كرام.. وإذا كان أحد بيعطيني حمامة سلام.. على شان اكف الكلام.. عن هذا الشعر اللي أي كلام.. ترى باذبحها.. يقول الأستاذ توفيق كل شيء يحبه ولكن الشطر الثاني «النَّعم.. ال ايه.. ال مالك لوا» أنواع الأوزان الثقيلة ياخي قل: (من نعم.. ثم ايه.. أو مالك لوا) لخف الثقل ولكن سؤال وش فرق بين نعم وايه؟!! قايلكم كيف الحال!! ثم البيت الثاني الشطر الثاني.. طبع يقلب الدنيا دوا ليه الدنيا وش هي؟ يانابغة!! يقلب الدنيا «ظلام».. هم أي شيء ولكن دوا.. هذا يسمونه في كتاب «خرطي القوافي.. إذا هبت السوافي» هو قافية أي كلام. تعالوا للبيت الأخير.. أو للقفلة أي الزبدة يقول: صرت كل اللي من أسبابك احبه تكفى دللني وقل: مالك لوا يا سلام يقول النابغة توفيق دللني وقل لي ماذا؟ طبعا ستقولون ابشر أو آمر.. أو تدلل.. هذا كلامكم ياللي ما تعرفون الشعر هو يقول: مالك لوا؟؟؟ يا توفيق بالله تعرف معنى مالك لوا؟ ترى معناها «لا» يابو الشباب وين أنت ووين هالقوافي ووين أنت ووين الشعر.. أقول يا توفيق يابعد الشعر عنك بعداااااه.. مانتب حوله!! *** آهٍ من زمن الشعر العجيب تعالوا لشاعر آخر له بعض القصائد الجميلة وأقيمت له كم أمسية بل إنه مستعد للمشاركة في أي أمسية على حسب ما أقرأ عنه في كثرة أمسياته يشرف على ملف للشعر.. ما تلاحظون شيء «أكثر اللي يجيبون العيد مشرفين ملفات شعرية»، وهذا سبب انتشار الشعر الرديء فالمجلة التي تجد بها رجلا فاهم تقل الخرابيط في الشعر مثل تركي المريخي في بروز.. مضبوط لكن لا يجيب العيد ويخذلني ثم أمسك به خط.. المهم شاعرنا نايف المطيري ويقول: أنت ما أنت اللي تعلمته وأنا داله وسالي ولا أنت من فرشته ضلوعي ولحفته احساسي يا جماعة انظروا الشطر الأول «أنت ما أنت» يعني جملة ركيكة وثقيلة في الوزن المهم.. الشطر الثاني وبالتحديد «لحفته احساسي» لا يمكن ان يستقيم المعنى حتى يصير في السنة ثلاثة أعياد شرعية!! لو قال:«لحفته احساسي» انكسر.. واصيب.. وأغمى عليه الوزن طبعا بل ستصيبه جلطة.. ولكنه يخففها نايف ويقول:«لحفته حساسي» هكذا تنطق بدون الألف!! يا نايف ترى الشغلة ما هي سايبه! «الحساس» معروف «والإحساس» معروف الأولى الصوت عند البدو فيقولون «اسمع الحساس» والثانية المشاعر فكيف بالله «تلحفه حساسك» يعني صوتك ليه هو ميكرفون؟! اقول يا نايف اقرأ «شعر» وشاور على قصايدك.. ترى بعض اللي تقوله حلو وبعضه مثل اللي في كتاب «خرطي القوافي.. إذا هبت السوافي» فهمت يا سنافي؟؟؟!! *** سعد.. سعد.. سعد.. وامسية.. ولقاء.. وصفحتين وغلاف وراح سعد.. وجا سعد.. هو سعد علوش الهاجري شاعر شاب وكل هالزحمة معه.. سبق ان كتبت عنه بعض ملاحظاتي الآن تعالوا للجديد: تبسمي يا اطهر معاكيش وساع يامن عليك مشاهد العيبه حكر ثم: الين صرنا بس فضاضة نزاع نفكر نعيش.. ونموت بلا فكر ثم: دايم تنسيني تفاصيل الوداع ذاكرتي محزن.. ونظراتك سكر يا سعد.. غروك عذالي وقالوا.. ان لعهد الشعر ناسي.. خلوك تخربط وتكتب.. وأنا أبكتب شي قاسي.. كلماتي وغناء: نوال «سرقة» المهم يا سعد علوش، وهذه أيضا تضاف لكتاب «خرطي القوافي.. اذا هبت السوافي» في فصل قصايد رفعة الضغط وزناً وترتيباً.. يا جماعة يقول «يا اطهر معاكيش وساع».. اطهر معاكيش أي اطهر عيون!! ثم «يا من عليك مشاهد العيبه حكر» اطهر عيون تحتكر العيب كله!! كيف هذا الكلام يا رجال؟ والله مشكلة ثم البيت الثاني: والشطر الثاني تحديدا سلم لي على الوزن وعلى الشعر يا شيخ.. «نفكر نعيش ونموت بلا فكر» لو قلت:«نفكر نعيش ثمٍ نموت بلا فكر» لا عتدل الوزن بعض الشيء مع أن به ثقلاً ولكنه ان تكسره كاملا!! هنا نبدأ نتأكد من شاعريتك.. تعالوا يا سادة.. واشربوا قهوة سادة.. على الشعر.. وناموا على الوسادة.. الشطر الثاني من البيت الثالث ذاكرتي محزن.. ونظراتك سكر أولا وش هالالفاظ ياخي إذا كان القافية بتجبرك على كذا ماهي لازم تصير مثل ابن جدلان أو علي حمري اكتب قافية سهلة.. ثم بالله من وين هالوزن والله لا وزن ريشة يا شيخ كسر «كبر ضلع ابانات وسواج» اقول يا سعد.. والله عجزت لاقتنع بشاعريتك مهما كان والأمسية جتك هدية لكن ما هنا شعر!! *** خط فرعي صديقي زبن بن عمير أقول وراك طمرت من الشعر على الفروسية أقول خلك في الشعر وادري ان الفروسية والشعر صنوان ولكن صاحب صنعتين كذاب يا صديقي.. وانضبط. نواف الدبل: لكي اثبت لك بأنني مع الشعر والشعر فقط وانني لست أحمل لك إلا الحب أقول كل عام وأنت بخير وصح لسانك.. صح لسانك.. صح لسانك.. على قصيدة «الوقت الاضافي» هذي نعم اعترف شعر.. شعر.. الله يوفقك ولا يهمك أحد. استشر في الشعر من تثق بشاعريته ليس بنجوميته عشان ما تصير في المجلد الثاني من كتاب «خرطي القوافي.. إذا هبت السوافي». .. ترقبوا العدد القادم على شارعين ونص واجهة شمالية.. شمالية.. جابر [email protected]
