كاس المؤسس جابه مرخان

بمناسبة فوز الجواد مرخان بكأس الملك عبدالعزيز في أول سباق على ميدان السباق الجديد «درة الميادين»
مليون لك مبروك يا أمير سلطان
يا نسل حر من حرار تشابه
كاس المؤسس جابه الخيل مرخان
يوم الخيول استسلمت له وجابه
يستاهل الكاس الجديدة كحيلان
ما غير أبو نايف يلوق بجنابه
يا زين شكل الكاس في كف سلطان
من يد ولي العهد راع المهابه
من كف أبو متعب ترى الفوز له شان
كاس الزعيم وقايد الشعب انابه
من مثل أبو نايف بها الكاس فرحان
يحق له يفرح وكل درى به
أول بطولة جابها ذرب الأيمان
سجل له التاريخ بأول كتابه
كل فرح بالفوز حضر وبدوان
وغنى مزامير الفرح والربابه
ودي أبارك لأبو نايف وعجزان
عجزت أحصل فرصة عند بابه
ودي مع الهاتف أهنيك عجلان
الفوز رجع كل عود لشبابه
عسى الفرح يدوم باصطبل سلطان
حيثه إليا نشن على الشيء صابه
جعل البطولة باسمكم دوم عنوان
يا شبه همال المطر من سحابه
يملا الفياض وينبت العشب رويان
بشاير الحوذان تضحك إعذابه
قصدي أبارك بس يا طير حوران
يوم المشاعر ما خذتها ثيابه
سلام مني عد ما قيل مرخان
خلال هاليومين كل حكى به
صلاة ربي عد همال الأمزان
على نبي سنته يقتدى به
محمد اللي وضح الدين تبيان
يا رب تجمعنا معه والصحابه