يا صاحي الفكر

بالله لا يغشونك
أهل الغشش والتحايل في تحايلها
خلك ولد منتبه واهتم في شونك
وافكار عمسين الارياء لا تخايلها
من فاكهة كذبهم حذرا يعشونك
حلوين الالسن تنبه من عمايلها
وبعطر الغشش والمخادع الا يرشونك
اللي على الخاربه تتعب رحايلها
في سوقهم لا يبيعونك ويشرونك
اياك تصبح حصيلة من حصايلها
بفكارهم فالخطر يمكن يطشونك
اخذ الحذر قبل تاقع في حبايلها
جنب قبل بالتهالك لا يحوشونك
البعد عنها يسدك عن جمايلها
وعكس اتجاه الرجولة لا يمشونك
مسيرة العمر لا تخطي دلايلها
ماكل من قال لك كيف انت وشلونك
محبتك في صميم القلب شايلها
رافق رجال عن الزلة يحشمونك
مصادر المعرفة بيضٍ فعايلها
على النقاء في مماشيهم يماشونك
كسابة الطيّبه من عصر اوايلها
هاذي نصيحة لحيث يهمني شونك
من شأن شرواك يالممدوح قايلها