صوت وصدى

يدوم البقاء باللي تؤرخ عمايله
بشبه الجزيرة نادرتاً مثايله
رشيد الزلامي شاعرٍ يشرب البحر
وتلقح قوافيه وللغير حايله
ولا من وصفته كنه البدر فالسماء
على الأرض من نوره تقادح فتايله
أنا يا رشيد اللي حداني وحدني
زماناً يصمل بي وتفشل صمايله
ولي خطوةً تستاهل البعد والعنا
ما خطت لمن ينثر بمتنه جدايله
ومن راح قلنا روحة مقيط بالرشا
ومن لا يجي برضاه ماني بجاي له
ترى ربعي العجمان هدامت الحما
ما عالت وتردع كل ما جات عايلة
سلاطين في المجلس شياطين في الوغى
وزوداً على العجمان يمناي طايلة
وربعك عتيبة والنعم وأثني النعم
هل الموقف اللي ما يعوض بدايله
هل السن وأهل العن كسابة الثناء
وكم جمع لاغارو تشتت فصايله
تعزويت من ضيقه وأنا مثلك اعتزي
ليامن تعزوى كل فارس بصايله
ترى العفو عند المقدرة شيمة الرجل
ولو ما قدر يسعى بشتى وسايله
وما دام في يده ليه ما يبذل السبب
وهو يدعي بنساب نجد وحمايله
وصار التباساً في المواضيع كلها
نبيها لسنجاره وراحت لوايله
زرعت الوفاء والطيب قانع ومقتنع
وكلاً يوقفني يعدد جمايله
وجميل الله أبقا ما تلفت للبشر
وهاذا كرم ربي علي وفضايله
الشاعر/ عبد الرحمن اباالجيش
****
هلا يا رفيقاً وافيات خصايله
وفعل الثناء يبقى والأرواح زايلة
ابا الجيش يرسلي رسايل ويشتكي
وأنا أقدر الطيب وقدر رسايله
يا ابا الجيش أنا بعض الشكاوي تحسني
خصوصاً إذا كانت على المتن مايلة
ولاني بلومك عارفٍ مربط الفرس
حبلك زمانك ودركنك حبايله
لكن واثقاً كل الثقة وكسب الرهن
ما يلحقك ضيماً وسط يام وقبايله
يشيلون عنك المعضلة لو نخيتهم
ولو تزهم الهيلا تجيك امتهايله
لكن استعن بالله واضرب على الخطر
وراكان ابن حثلين جدد فعايله
إلا اذا كانت قضيتك غامضة
ومتحمل حمل المحبة وشايله
طريح المحبة مثل ما قيل بالمثل
ليا شفت حال المبتلا لا تسايله
وهاذا ما يعذرني لكن وضح الخبر
ابي لي كلاماً واضحاتاً دلايله
وما لي وجاهي معك وابشر بفزعتي
فزعت غلاماً يابساتاً بلايله
راعي الوفاء شرواك يستاهل الوفاء
ناقف بصفه لين يشفي غلايله
انجت على كيفك هاذا اللي يسرني
وبرق يصد وينتحي لا تخايله
ركباً وراء المقفي يسبب لك التعب
ويفرح عليك الي يضيعون قايله
هاذي علوم البدو والحضر كلهم
وان كان ما يعجبك ماني بقايله
الشاعر/ رشيد الزلامي