شاعر وأكثر من صورة

تواضع
يا راس لو كل المفاخر تحتويك
خل التواضع لك شعار بكل حال
ولا تبيع اللي بعمره يشتريك
و من لاحسب لك لا تحطه راس مال
* * *
علوّ
من يبي يطلع على روس النوايف
ما يطالع للمنافس وش يسوّي
و من شرب بيدين غيره صد عايف
لو يُقال انه من الجمّة مروّي
* * *
غيث
يا زين وجه الارض من بعد المطر
تحس ماجتها تجاعيد السنين
تختال بسمتها رياحين وعطر
وتهدي عبير انفاسها للعابرين
* * *
هبايب
تهب ذكراك في صدري وصبري يميل
وتدور في فكري الشارد تفاصيلها
ما اقول فيني على بعدك وفرقاك حيل
اقول غنّت لي الورقا مواويلها