يا طالب الدنيا

- صحن بن قويعان

يا طالب الدنيا تبي منها الاطماع
منفذٍ ثوبك وتركض وراها
لاتحسب ان الرزق يوخذ بالاسراع
تتعب ولا انته لاحقٍ منتهاها
ان طعتني خلك شكورٍ وقناع
النفس لاتمدي لها في هواها
اليا عطتك الشبر لاتطلب الباع
واليا عطتك الوجه خف من قفاها
كم واحدٍ يشري يبي الربح ماباع
مالت عليه وحاجته ماقضاها
ميلاتها ما خلت الناس هجاع
اياك وايّا واحدٍ ما بقاها
وينه وين جنوده اللي له فزاع
اللي على الكفار دارت رحاها
خلا هل الاصنام للحق ركاع
حسن شواربها وسبل الحاها
ماعاد لاصحابه سمايا على القاع
الا عظامٍ طيب الله ثراها
ولها على دار المقيمين مهزاع
مادهدمت بحفورها ماكفاها
الله يهدينا على خير الاسناع
وانه يريح قلوبنا من شقاها
ويجعل منازلنا رفيعات ووساع
يوم الجوارح تعترف في خطاها