ليت الليالي بغيبهن خبرنّي

يا ناس خلُّو خاطري يرجهنِّي
خلُّوه يمشي في هواه وغرامه
وشكاركم لو طحت بالنار منِّي
خلُّو طريقي لو لحقني ملامه
يا عاذلي بالله لا تمتحنّي
أورود قلبي مرزماتٍ حيامه
على عشيرٍ فيه ربي فتنّي
أقفت ضعونه يا حياة الندامه
يا وجد روحي لو يفيد التمنّي
هني من يلحق هواه ومرامه
يا صاحبي عنك العلوم أرمسنّي
قلبي من الفرقا تزايد هيامه
ليت الليالي بغيبهن خبرنّي
قبل أتحيّر بين شِدّه وقامه
بأربع حرابٍ من نظيره طعنّي
أودع صناديق الصماير هدامه
خلاّ عيوني بالدجى يسهرنّي
يا شيب عيني وين أنا والسلامه
أجاذب العبرات لين اهضمنّي
حسيبك الله يا معورج وشامه
إليا اقفت العبرات ثم أقبلنّي
يهل دمعي مثل وبل الغمامه
ياتل قلبي كان ما خاب ظنّي
تل الرشا من بين سبعين قامه
عن صاحبي سود الليالي أبعدنّي
بيّن بحالي من فراقه علامه
أقفى وخلاّني على الدار كنّي
كسير ساقٍ ما تشيله عظامه
ودّه يقوم وكل ما طاح ونّي
ماله جدا إلاَّ عض بسرة إبهامه
الشاعر/ أحمد الناصر الشايع