غرتك دنياك

أسأل الدنيا وش اللي به جرى
قل عسى ما شر يالطرف الخجول
وش تغيّر وش حصلِّي وش طرى
غيبتك هالوقت صارت بي تطول
والوصل حبله تراخى واهترى
ما تطول الهامه اللي به نزول
خاتمتها تمشي وترجع ورى
ما يرد الحال شيلات الحمول
لا نزف جرحٍ تراهو ما برى
خذ من الدنيا عبر واحذر تقول
مبصرٍ بالناس وانته ما ترى
لو بغيت اجيك وانته لي ملول
ما تخلينا هبوب بلا ذرى
تاقف الصعبات لا شفته تهول
يا قليل الفود تدفنك الثرى
غرّتك دنياك والرأي العجول
ما عرفت اللي تبيّن واعترى
السنة فيها ترى أربع فصول
كل منّا يعرفه لو ما قرى
لابغيت الحل ما تلقى حلول
كل سلعة ما تباع وتشترى
والقلوب عيون دايم به فضول
كل ما هبّت رياحٍ بالكرى
عارضتني كنها برقٍ خيول
بيّحت سدّي وطيفه افترى
لفحة اللي جت على دين الرسول
عوضتني همّي اللي قد سرى...
الشاعر- ناصر المتعب