حبس المشاعر

لا تخبي غلاي إن كنت تغليني=منك حبس المشاعر ظلم بالغالي
كلما شفت عينك يانظر عيني=قلت ياذا العذاب اللي تهيّالي
شفت فيها شقاي وجددت فيني=حيرتي والسؤال اللي على بالي
لامتى وانت تبعدني وتدنيني=ليه اشوفك بعيد وزولك قبالي
لامتى الحاجز اللي بينك وبيني=كلما مر يوم يزيد في العالي
شايف الشوق في عينك يناديني=كل نظره تقول إن السعد فالي
وانت دونك جدار الصمت حاديني=صمتك اللي سبب همي وغربالي
كم تمنيت يوم إنك تلاقيني=تشتكي لي وتسألني عن احوالي
إنتظرتك تطيع الشوق وتجيني=إنتظرت إنتظرت أيام وليالي
عمري اللي تعدى واجمل سنيني=فات والعالم الله ويش يبقالي
خايف إنك تجي في يوم ناصيني=ماتجد شي مني يرسم ظلالي
لا انمحت من على الدنيا عناويني=ولابقالي مع الحيين منزالي
وقتها غصب من دنياك تلغيني=تحذف إسمي وتحذف رقم جوالي
كان قصدك بعد ما اموت تبكيني=ليش تنثر دموعك في الخلا الخالي
دمعةٍ في غيابي ماتواسيني=ولاتبدل هذاك المر بالحالي
لو تخلي بيوت الشعر ترثيني=لين تصنع من الأشعار تمثالي
ماسكبت السعاده في شراييني=ولا انت واصل لروحي والجسد بالي
طيع شوري وحط يديك بيديني=ليش تاقف لحالك وآقف لحالي
دام يمديك يالغالي ويمديني=حطم الحاجز اللي حطم آمالي