تقهو الشموخ وقلّطه بأولوياتك

تمسّك بها في منتهى الجد لا جاتك
ترى فرصتك ممكن اليا روّحت ما جتك
مثل قولت القايل قطار الأمل فاتك
تحيزم بصبرك وأعصب الرأس في همتك
وتسلح بعون المعتلي في مساراتك
هدفك أرسمه وابذل له الجهد من هقوتك
ترى اكبر نصر - نصرك صراحه على ذاتك
تجاوز رها ذاتك وراهن على اطلالتك
واذا جيت برهن ما يبرر غياباتك
شف الدرب لا حددت قبل الخطا يمتك
ضروري تراجع قبل تمشي خطواتك
أحسبها بدقه وامعن الفكر في حسبتك
قرارك ولك حريّتك في قراراتك
ولكن تخيّر ما يحافظ على قيمتك
ولو طال تفكيرك وكثرت خياراتك
تأخرك عادي واحسب لعاقبة سمعتك
تميّز وميّزها بكل اتجاهاتك
اذا جيت بالوقت المثالي بقت بصمتك
على مسرح الواقع عمى عين شماتك
على وجار صيتك قرّب النار من دلتك
تقهو الشموخ وقلّطه بأولوياتك
قهوة المفاخر طعمها غير عن قهوتك
فريدة مذاق وفارقه عن مذاقاتك
شف اطول جبل وارقه ورز بيدك رايتك
ثرى الشاهقات أنسب مقر لطموحاتك
تسام بسموك والمس الغيم في هامتك
سماء المجد رحب ويشبع جْياع رغباتك
تسنّم سنام العز واقضب شداده وإتك
نعم ساعتين بعز تسوى سنواتك
غض أعداك واشبعهم من الغبن وافتك - فتك
بهم كل ما لموا فلول لملاقاتك
حواسيد طيبك لا انطفت همتّك ذمتك
تسوق البشاير يوم تسمع خساراتك
مهو عيب كان ركاب من نافسك عدتك
ولاهوب عيب انصافها باعترافاتك
بيان الحقيقه عدل وان قلتها ميزتك
رقيٍ تضيفه في دواوين ميزاتك
مثل ما رغبت الناس ترغب مثل رغبتك
لها حق تحلم وانت تحلم بمشهاتك
خطاك الكبير ان كان تبقى على حالتك
تمر السنين ولا تغيّر قناعاتك
الشاعر - عبدالعزيز الشهيل - حفر الباطن