خلد له بصفحات الأمجاد سيرة

خيم ظلام الحزن في كل ديره
سبة وفاة اللي به الطيب مذكور
نسل الملوك موحدين الجزيره
شيخ تعلى المجد له بالوفا دور
خلد له بصفحات الأمجاد سيره
فهد حفيد اللي بنى للحرم سور
مروي نهار الكون حد الشطيره
راع الفرس والسيف والسرج والكور
وراع الشجاعه والكرم والبريره
وفهد خذا من سيرة الجد دستور
نجمٍ سطع بين النجوم المنيره
يا اللّه عسى ذنبه من الرب مغفور
يا رب عن نارك بعطفك تجيره
وافتح عليه القبر من جنّة الحور
يا واحد ما يرحم العبد غيره
وعزاي للي وقت الأزمات مخبور
عز الرياض وفخر عزه واميره
يا سيدي جعلك من لباس ماجور
ابجاه جبار العظام الكسيره
حكم القضا نافذ ومنهي ومأمور
واعمار خلق اللّه ما دامت قصيره
ما دايم إلا نافخ الروح فالصور
فالاولى والثانيه والأخيره
ثامر القطيم السبيعي