عاشت بلادي جوهرة كل الاوطان

سر يا قلم فوق أبيض الطرس قيفان
من قلب مخلص يفتخر في أميره
كل الفخر هو سيدي طير حوران
ولي العهد حفيد صقر الجزيره
محمد بن سلمان و ان قلت سلمان
سلمان بن عبد العزيز الذخيره
متخرجٍ من مدرسة عالي الشان
أبو فهد زبن الضعيف و نصيره
للعز و الهيبة و الامجاد عنوان
سطرتها يا سيدي بالمسيره
روح الشباب اللي سطع نجمه و بان
ما يعترف بالكايدة والعسيرة
من هيبته تخضع مقامات و أركان
ليا قال قول ما يبدل بغيره
أنت المحنك و السياسي و الانسان
لأجل الوطن دايم عيونك سهيره
يرعاك ربي يا سلايل كحيلان
يا باذل اسباب النجاح الكبيره
لك روح وثابة و لو كان ما كان
ما هي من اللي بالمعالق أسيره
مع فكر ثاقب ما هو حاير و بحلان
تبرا لسموك الحظوظ الوفيره
نسل الكريم اللي تميز بالاحسان
راع العطايا الجزيلات الكثيره
مليكنا ياللي تفاخر به أوطان
تدعي له قلوب الجموع الغفيره
يسكن غلاه قلوب حضر و بدوان
في مجلسه حي الوجيه السفيره
زيزومنا و ان ثار بالعج دخان
يركي على كبد المعادي سعيره
عاشت بلادي جوهرة كل الاوطان
أعشق هواها عن هوى كل ديره
فندي الغوينم