ظامي القاف

وما يزين القصايد غير شعر قوي
عشت وياك همي في الليالي سوا
صرتي أوفى عشير وكنتي أغلى خوي
في دروب المواجع ذيب حزني عوى
ذيب حزني لحزني صار يعوي عوي
كيف نفسي صبوره كيف قلبي قوي
جاه فوق المواجع نار تكوي كوي
ان شحذت الخطاوي عاندتني الهوا
وان مشيت الأراضي دربها يلتوي
وان نظرت السحايب ناظري ما ارتوى
وصار غيري لوبله يشرب ويرتوي
نام حظي وعاند برقها ما ضوى
زل هملول مزنه يمطر ويقتوي
كن حظي طريح وسط بيره هوى
وطاح فوقه حصاة وطاح كل الطوى
يا قصيدي لك الله وهج حرفي ضوى
بين ذيك الحنايا ساكن وملتوي
ظامي القاف حرفي عاطش ما روى
وما يبل القصايد غير بيت قوي
عبد الله سليمان العمار - القرائن