الهدايا

الغلا ماهوب في سعر الهدايا
الغلا فاللي مقدم لك هدية
دام قدره غاليً بين الحنايا
مايهم القلب وش نوع العطية
وأنتي أغلى يا بعد كل الصبايا
والهديه جات من كفً ندية
تعتبر بعد اللقا عندي بقايا
ذكرياتً تطري الموقف عليه
العيون الحور مع سحر الشفايا
وعطرك الجذاب والريحه زكية
كلها في داخلي سوت سوايا
.سحرتني وأودعت قلبي ضحية
يا عظيمة فالوصوف وفالمزايا
أعشقك عشق البدو للشاذلية
حبنا مبني على بيض النوايا
مايهزه ريح والنية مطية
ما بخلنا مع بعضنا بالعطايا
والمعاتب حكمنا وقت الخطية
والله أني ماحسدت إلا المرايا
حظها في شوفتك صبح وعشية