دوامة التفكير

هليت عبرة فراقك من الم في سكات
واللحظة اللي تجيب فراقك أملها
تمر دوامة التفكير بأربع جهات
وتصطدم بالجهات الأربعة كلها
أحاول أنسى واردد كل مافات مات
وأقول ليه الدموع من أجلك أهلها
ما أظن تحتاج يا المجمول مني وصاة
قضية الحب بيدك وعطني حلها
متى تجيني ضعونك يالغضى مقبلات
وكبودنا من مزون وصالك نبلها
نعيد بالوصل ما يرضي من الذكريات
والذكريات الأليمة نقدر نزلها
تغدي رياض الحشى من شوفتك مزهرات
ما فيه غيرك محاني روحي يدلها
أصبح وقيِّل وخذ لك بالمشاعر مبات
وادخل قلاع المشاعر قسر واحتلها
وأعمر ديارك بقلبي ثم لم الشتات
وسيوف هجرك دخيلك بطل تسلها
قلوب من دون أحب أشوفها خاويات
وقصور من دون رود وش فايدة زلها
وحب من دون وصل بيفتقد للثبات
والروح ما تستقر إذا هجر خلها
اربط عرى الود في دنيا الغلا بالصلات
وازرع نخيل الوصال يبردك ظلها
تعال ننسى كلام أهل الردى والوشاة
ونعيش زهر الحياة ونقتطف فلها
ما أقول هذي حياتي كيف ما جات جات
لأجل إنها لو غدت ما بقدر أعلها