ليلة فراق

الليلة هذي واضحة ليلة فراق
حاولت أعديها وعيّت تعدي
ظروف ما تنطاق ولا راح تنطاق
صد القدر ما هو بصدك وصدي
تعال أخذني بين أياديك مشتاق
قبل انتفارق حط يدك بيدي
بجلس معك ساعة حبايب وعشاق
من بعدها كيفك ولو صرت ضدي
فيني خليط أشواق بأشواق بأشواق
واصل معك من كثرت الشوق حدي
ودي ألمك وأحضنك حضنت عناق
يا شيب عيني كل ما قلت ودي
في خاطري.. وش خاطري ؟ خاطري ضاق
الكون كله ضاق ما هو بقدي
حتى الدموع اللي استحت كبر وأخلاق
تساقطت من فوق خدك وخدي
لوحة شعر تبكي على بيض الأوراق
بيّحت فيها من ردى الحظ سدي
ليلة جفا وفراق ما مثله فراق
حاولت أعديها وعيّت تعدي