بيني وبينك

يا طير لا حطيت عيني بْعينك
رويت لك بسكات قصة حياتي
مدري وش اللي صار بيني وبينك
ارتحت لك من بدّت الكائناتي
أستعطفك لين ارتويت بْحنينك
ولميت من نظرة عْيونك شتاتي
سولفت لك من غير م أسمع رطينك
وقريت لك ما كان بمْذكراتي
وفضفضت لك بأسرار قلبٍ رهينك
وغنيت لك حتى وأنا في مباتي
وشكيت لك همي بْحسٍّ يدينك
ويعتب عليك أن كان تجهل صفاتي
لا غبت عني فالفضاء قلت وينك؟
وينك تجي ياغايتي يامُناتي
أما معي عالأرض والله يعينك
جرّب حياة السجن واصبر سْواتي
وأن كان واكبت المسيرة بْحينك
وإلا ليا من طرت خذني بْذاتي
خذني حرام إني على أمرك ودينك
مابي معك يا طيري إلا عباتي
هونت من ذاك التغطرس,لعينك
عدّلت من طيبك عواجة عصاتي
كابرت يوم أطغى هوى النفس لينك
ورضيت بُعدك لأجل أجرّب غلاتي
يكفي من الترحال ضاعت سْنينك
بأنعم معك باقي العمر في سُباتي
وأبعترف يا طير بيني وبينك
بْلَيّاك ما تسوى رْيالٍ حياتي
شاعرة نجد