شهر على غيبتك مر !

اليوم انا محتاج لك كثر احتياجي للصبر
كثير احتياجي للفرح بعد ولأنفاسي معاه
كثر الوجع كثر الحزن كثر الألم كثر..كثر
احتاج لك واعرف : ما احد يحتاج فالعمر لشقاه
شهر على غيبتك مرّ..وغيبتك عيّت تمرّ
شهر.. وأنا مدْري أنتمي للموت.. وإلا للحياه؟!!
وحيد..مدري وش ورى هالوحده لروحي قدر
بعيد..مدري للفرح هالبعد هذا وش وراه؟!!
انساك في لحظة"غبا"واطيح من عين العمر
واذكرك حلمٍ كل ما يقرب من التحقيق تاه
تعبت اشيلك في مطارات الزمن"شنظة سفر"
واضيع في زحمة دروب البعد..والقاك إتجاه
عطيتي النسيان فرصه يأخذك مني غدر
ولا عطيتي عاشقك فرصه يودع بك غلاه
وجهك يمرّه في زحام البال بوجيه البشر
وتقف عليك الذاكره ويصيح : قلبك من خذاه؟!
ما خلت رياح الغياب بقلب محبوبك شجر
نسيانه يراوده عن حبك ولكن ما نساه
ما كان مختارك زمن يمضي.. ولانزوه تمرّ
اختارك العمر الذي كل ماكبر يكبر معاه
يدري رجوعك مستحيل ، وصعب .. لكن ينتظر
مثل انتظار المغترب للموطن اللي ما لقاه
اللي يحبك كان يبحث لك ورى بعدك عذر
واليوم يبحث عن عذر للمقبل اللي فيك تاه
خلاك للدرب الطويل.. ولليالي.. والقدر
كنتي بعينه دمعه الغالي.. و ودعك.. وبكاه