حتى الشجر ما عاد به ظل ... !

يا صاحبي ما عاد به صاحب وخل
كل البشر حولي وحوش وضواري
هذا زمان الجوع والكذب والذل
وهذا زمان مدورين الاثاري
ما احد ٍ على شوفك يبي يفرش الزل
ولا احد ٍ على فرقاك هَلْ العباري
كل ٍ بنفسه شايل الحقد والغل
يا كثر من قلبه من الطيب عاري
ناس ٍ تفيّا في عمارات وفلل
وناس ٍ فقارى ما تحصّل مذاري
حتى الشجر ما عاد تلقى بها ظِل
يبست وتذراها هبوب الذواري
والغيمه اللي وبلها ما بعد حَلْ
صارت سراب وجف ما بالغداري
مّلّت خطاوي رحلتي والصبر مَلْ
ما فيه داعي للتعب والمساري
الحنظله ما تنبت الشيح والفل
لو هي على نهر ٍ من العذب جاري
يا قِل من يحرص على الطيب يا قِل
وياكثر ناس ٍ بالخطاوي تماري
هدايف ٍ تكرم عن الطيب وعلل
ما للشهامة في لحاهم مواري
يا صاحبي والوضع ما عاد له حَل
المرجله ما بين بايع وشاري
تخالطت هزلات الايام والجِل
وتساوت صقور الهدد والحباري