قلب البنادم بيت ولسانه الباب

الطاري اللي يجذبه راس مرقاب
أنهى صيامه بعد طولّ صيامه
لو غاب عن بالي عن الروح ماغاب
عاود واهني عودته بالسلامة
أطيع وارقى والخطايا للأسباب
حتى ولو طار الهوى بالعمامة
قلب البنادم بيت ولسانه الباب
ويكفيك عن بعض الكلام ابتسامة
والشخص صورة تنتهي بين الأهداب
لاصار ما يفرض عليك احترامه
وكلش يذوب ومعدن الرجل ما ذاب
والدرب في عين الضرير استقامة
وان كان ما لك مع سباع الخلا ناب
لاتسري الليل الطويل وظلامه
وانا زرعت الطيب في بعض الاصحاب
وفي ساعة الشدة حصدته ندامة
وش عاد لو ودىّ زماني ولاجاب
الصد شيمة والتجاهل كرامة
خريج دورات الليالي وأنا شاب
واليوم في دقني لعمري علامة
أيام يلحقني مشاريه وعتاب
وأيام مرتني مرور الغمامة
يا ما خسرت أحباب واصحاب واقراب
كله على شان الحقيقة ملامة
أقرأ من الدنيا وأنا صدري كتاب
مطبوع من خِبر الزمان وهيامه
عشرين عام هيام ودروس وحساب
والحلم يبني في الضلوع ازدحامه
لين وقسا والله رحيم وتواب
والا العمل ينشر بيوم القيامة
بينه وبين مدوره ستر وحجاب
لو ان عينه عين زرقاء اليمامة