ذاك الغلا

تعبت أقاوم ضيقة البال والروح
ماهيب من جيش الطواري مريحه
ياخذ بها الهاجس مشاوير ويلوح
برق الأمل لو مالها إلا لميحه
لكن عزاء قلبٍ من أقصاه مجروح
علمٍ حوى معنى الجواب وصحيحه
صبرٍ جميل..وباب الأفراج مفتوح
والسر صعب أن المشاعر تبيحه
كذا ما عودت المشاعر على البوح
حتى لو أنها من زمنها جريحه
وذاك الغلا..اللي له مواثيق وصروح
بالروح والأعماق لأجله مشيحه
يقودني له صادق الشوق ويروح
القلب يمه والمشاعر صريحه
والود لا من صار نابع من الروح
ما غير خلاق الخلايق يزيحه
تبقى قناديله..لها بالوفا ضوح
مثل الفعول السامية والمليحه